Blagettekünschtler: Frank Schmohl
Sali mitenand! Hüt entzünde mir zämme e bsunders Füür. –
S isch dr Faasnachtsfungge, won i gspüür.
Jeede und jeedi weiss es – wämmer wette?! –
S goot um d Enthüllig vo dr neue Faasnachtsblaggedde.
Wenn dr P(R)OSCHT-WAGGIS-Obmaa do voorne stoot, git s nüt z studiere –
dää gseet so uss wien iich, heisst no glyych – und döörf si euch jetz präsentiere.
Was isch s, wo no immer de Rynacher iiri Gmüeter duet erhitze,
dass si nümme entspannt chönn sitze und föön brutaal aa schwitze?
Richtig! – Dass s Gäld au z Rynach d Wält regiert,
macht alles mega kompliziert.
Duur Spaarmaassnaame vo dr Gmeind isch unseri Jugend diräggt tangiert –
drum isch me rundum ächt rächt fruschtriert und irritiert.
Fürs Schwümmbi het me d Öffnigszyte krass reduziert
und doo demonschtriert, dass me nid jugendfründlich reagiert.
Soo het me zum Spaare au grad no bim Feerie(s)bass nid vill studiert,
wenn dää für d Rynacher Chinder isch blockiert.
Dää Umstand het au dr Blaggeddekünschtler regischtriert
und drum e unwoorschyynlich dräffends Kunschtwäärgg konzipiert.
Doo drunter schlummeret das Bijou, no immer verhüllt.
Kei Angscht! – Euch wird eure innigschte Wunsch jetz grad erfüllt:
D 2026er-Blaggedde wird im Groossformaat enthüllt.
Won iich si gsee ha, han i voor luter Freud fascht duuredrüllt.
Also, liebe Alain, setz dääre Waarterey en Änd und löös dr Drugg!
Das heisst: Gib dyne Finger an de Händ e Rugg!
Doo stoot äär also in voller Bracht,
dää cooli Waggis, wo drotzdäm lacht.
Es blybt em jo nüt anders, als über d Entscheid, wo si im Gmeindroot mache –
die schwache – schelmisch uf de Stoggzeen z lache.
„Über Rinaco-City sääglet dr Pleitegeier“,
seit d Frau Müller zur Frau Meier.
„Iich bi mir im Klaare. Dääne sött me doch an Chaare faare,
wil si beduurlicherwyys am falsche Oort düen spaare.“
Beduurlich isch: Dr Raame wird gsprängt, will s niene me längt. –
Wäär hätt daas dänggt? – Daas bruuche miir nid gschänggt! –
Die finanzielli Unterstützig wird drastisch gsänggt,
drum het sich unsere Hauptdaarsteller muetig voor dr Fünfliber drängt.
Düend jetzt eifach alli ganz guet loose!
Äär sybolisiert zwüsche de Wappedeil mit synere Poose
und de uusezoogene Sägg vo synere Waggishoose,
dass äär drotz Spaarmodus zun ere geile Faasnacht hüt duet bloose.
Mir Faasnächtler sinn realistischi Idealischte
und göön als Optimischte ab uf d Pischte.
Soo wänn mir Freud bereite jeedes Joor ufs Neue –
doo döörf uns doch dr Stutz nid reue.
Die schöönschte Dääg im Joor wäärde au daasmoll nid uffghoobe,
si wäärde unwidersteelich drotz leerer Kasse duurezooge.
Als groosszüügigi Faasnachtsnarre glätte mir d Wooge
und hoffe, me ghöört und gseet uns au do oobe.
Chaufed das Schmuggstügg, draaged s stolz und düend dermit glänze! –
Nach unserem Hoggemässer-Wappe sprängt s au suscht alli Gränze.
Die eimooligi Meischterleischtig wird in d Gschicht yygoo,
und – so hoff i doch – positiivi Spuure hinterloo.
Mir blybt schlussändlich no, dr Blaggeddezeichner wäärtschätzend z loobe.
Das isch dyy Applaus, dää choschtet nüt und wird au nid verschoobe.
Danggschön euch allne vo Häärze – würg!
P(R)OSCHT-WAGGIS zum 42schte Moll – dr Jürg